ەگەر ستانساعا كەلگەن ۆاگون, تسيستەرنالاردىڭ پلومبالارى بۇزىلعان بولسا نەمەسە وندا ناقتى قىلمىس جاسالعانى بايقالسا, ستانسا قىزمەتكەرلەرى مەن ترانسپورتتىق ميليتسيا ءبولىمىنىڭ قىزمەتكەرلەرىنەن قۇرىلعان كوميسسيا جۇك قابىلداۋشىعا كەلگەن جۇكتى تاسىمالداۋ ءتارتىبى بويىنشا سانىمەن نەمەسە سالماعىمەن ولشەپ تاپسىرۋعا ءتيىس.
ال جۇك قابىلداۋشىلاردىڭ ءبىرى – تسەلينوگراد قالاسىنداعى اراق-شاراپ زاۋىتى بولاتىن. سول جىلى اتالمىش زاۋىتقا كەلگەن سپيرت قۇيىلعان تسيستەرنالاردا جاپپاي جەتىسپەۋشىلىك بايقالا باستادى. ءار سپيرت جەتىسپەگەن تسيستەرناعا كوممەرتسيالىق اكتىلەر ءتۇزىلىپ, اتالعان بولىمگە ىزدەستىرۋگە جىبەرىلىپ جاتتى. بۇل ماتەريالدار بويىنشا ىزدەستىرۋ شارالارى اعا ينسپەكتور سۇلەيمەنوۆكە تاپسىرىلدى.
ماتەريالدارداعى «جالپى اكتىلەردىڭ بارىندە» «تسيستەرنا كەلگەن بەتتە ونىڭ پلومبالارى مەن ليۋكتەردى بايلاعان سىمدارىنىڭ جوقتىعى انىقتالدى», دەپ جازىلىپ تۇردى. سوندىقتان ءبىراز ۋاقىتقا دەيىن الگى كوممەرتسيالىق اكتىلەر تسيستەرنا كەلگەن پويىزدىڭ ءجۇرۋ گرافيگى بويىنشا تسەلينوگراد ستانساسىنا دەيىنگى توقتاعان ستانسالارعا جىبەرىلدى. بىراق ولار تەكسەرىس جۇرگىزىپ, جاۋاپ بەرگەنشە ءبىراز ۋاقىت وتەتىن ەدى. سول سەبەپتەن باستاپقى ءىس-ارەكەتتەر ناتيجەسىز بولدى.
سوندىقتان «ساراپتاۋ پاركىنىڭ» جۇمىسىن قاداعالاۋ جەدەل توپقا جۇكتەلدى. اراق-شاراپ زاۋىتىنىڭ جۇمىسشىلارى دا باقىلاۋعا الىندى. وسى جۇمىستاردىڭ بارىسىندا تۇسكەن ماتەريالداردى ساراپتاي وتىرىپ, اراق-شاراپ زاۋىتىنا باراتىن قىسقا تەمىر جول بويىنا تورۋىلدار قويىلىپ, تسيستەرنالاردىڭ ءوتۋ گرافيگىن تەكسەرۋ مىندەتتەلدى. بۇل امال ءوز جەمىسىن بەردى.
سودان باقىلاۋ نەگىزىندە ستانسا جاقتان كەلە جاتقان كەزەكتى لوكوموتيۆتىڭ جارىعى كورىندى. اراق-شاراپ زاۋىتىنا باراتىن تۇيىق جول بويىندا جالعىز ءۇي بولاتىن, وندا جاسى ۇلكەن ءبىر كەيۋانا تۇرۋشى ەدى. سول ءۇيدىڭ تۇسىنا جاقىنداعان كەزدە الگى لوكوموتيۆ سوڭىنا تىركەگەن ەكى تسيستەرناسىمەن باياۋلاپ كەلىپ توقتادى. جەدەل توپ تۇندە كورەتىن قۇرالمەن باقىلاپ قاراسا, تسيستەرنانىڭ ۇستىندە ءبىر كىسى قۇنجىڭداپ بىردەڭە ىستەپ جاتىر ەكەن, ال ارعى بەتىندە نە بوپ جاتقانى كورىنبەدى. م ۇلىك قورعاۋ ءبولىمىنىڭ باستىعى ا.كوكانوۆ وتە ساقتىقپەن باقىلاۋ ورنىن اۋىستىرىپ, ارعى بەتىندە نە بولىپ جاتقانىن قاراپ, ءۇش-ءتورت ادام كانيستر, فلياگا تاسىپ جاتقانىن بايقاعان سوڭ, جەدەل توپقا قايتىپ كەلىپ: «10-15 مينۋت كۇتەيىك, سوسىن بارايىق», – دەدى.
ءسال كۇتكەننەن سوڭ, ەكى ادام لوكوموتيۆكە, قالعان توعىز ادام ارعى بەتتەگى ۇيگە بەت الدى. الگى ۇيگە كىرسە, ءۇش تەمىرجولشى مەن ءۇي يەسى ۇستەل باسىندا اراق ءىشىپ وتىر ەكەن. ءۇي ىشىندە ايتارلىقتاي جيھاز جوق. ەكى بولمەنىڭ بىرىندە كانيستر, فلياگا, بيدوندار تولىپ تۇر. ءىشىپ وتىرعاندارى دا سپيرت بولىپ شىقتى. جاڭاعى ىدىستاردىڭ بارلىعى تولعان سپيرت.
سودان سوڭ جەدەل توپ ستانسا كەزەكشىسىنە لوكوموتيۆ بريگاداسىنىڭ ۇستالعانىن حابارلاپ, ولاردى ميليتسيا بولىمىنە الىپ بارادى. تەرگەۋ امالدارى جۇرگىزىلىپ بولعاننان كەيىن ءىس سوتقا جولداندى, بىراق ءىس بىرنەشە رەت قايتا تەكسەرۋگە جىبەرىلدى.
اقىرى ۇرىلار سپيرت ۇرلىعىن مويىنداپ, قىلمىستىق ءىس قايتا قارالىپ, كولىك پروكۋراتۋراسىنىڭ بەكىتۋىمەن سوتقا جىبەرىلدى. سوتتا ۇرىلار ءتيىستى جازاسىن الىپ, باس بوستاندىقتارىنان ايىرىلدى.
امانگەلدى ارىستانبەكوۆ
استانا
